محترم حضرت حکیم صاحب السلام علیکم! عبقری رسالہ پڑھتے چند سال ہوگئے ہیں‘ اللہ کا شکر ہے کہ اس رسالہ نے اجڑے گھر بسادئیے اور یہ میں نے اپنی آنکھوں سے دیکھا ہے۔ مجھے دس سال سے گیس اور معدے کا مسئلہ تھا‘ ہومیو ‘ایلوپیتھی‘ دیسی ادویات سب استعمال کی ہیں‘ سب کا وقتی افاقہ ہوا‘ مکمل آرام نہیں آیا‘ پھر ہمارے ایک جاننے والے نے نسخہ بتایا جو کہ نہایت سستا اور آسان تھا۔ میں نے وہ بنایا اور آج الحمدللہ چوتھا دن ہے استعمال کرتے ہوے کسی قسم کی کوئی تکلیف محسوس نہیں ہو رہی ‘صدقہ جاریہ سمجھ کے شیئر کریں اور تندرستی آنے پرحسب توفیق کچھ پیسے اللہ تعالیٰ کی راہ میں صدقہ کریں ۔اللہ پاک ہم سب کا حامی و ناصر ہو اپنے پیارے نبی پاک کے صدقے تمام مسلمانوں کو صحت کاملہ عطا فرماے۔ ھوالشافی: ایک کوڑتمہ لے کر اس پر چھوٹا سا کٹ لگا کر اس میں سے جالا نکال دیں لیکن بیج نہ نکالیں‘ اب اس میں دیسی اجوائن احتیاط سے بھر کر اس کا منہ آٹے سے بند کر دیں اور پتلے کپڑے میں باندھ کر دھوپ میں رکھ دیں‘ خشک ہونے پہ ہاون دستہ میں پیس لیں‘ برابر مقدار میں شہد ملا لیں یا ایسے ہی پانچ گرام صبح وشام نیم گرم پانی کے ساتھ استعمال کریں۔ گیس ‘قبض ‘معدے کی جلن‘ سر درد‘ جوڑوں کے درد کے لیے بہترین ہے۔ (شاہ محمد وسیم‘ ملتان)